Þeir sem fá greidd laun fyrir sjómannsstörf á íslensku skipi eða skipi sem gert er út af íslensku skipafélagi, eiga rétt á sjómannaafslætti.

• Sjómannaafsláttur á tekjuárinu 2012 er 493 krónur á dag.
• Sjómannaafsláttur á tekjuárinu 2011 er 740 krónur á dag.
• Sjómannaafsláttur á tekjuárinu 2010 er 987 krónur á dag.
• Sjómannaafsláttur á tekjuárinu 2009 er 987 krónur á dag.
• Sjómannaafsláttur á tekjuárinu 2008 er 874 krónur á dag.
• Sjómannaafsláttur á tekjuárinu 2007 er 834 krónur á dag.
• Sjómannaafsláttur á tekjuárinu 2006 er 787 krónur á dag.
• Sjómannaafsláttur á tekjuárinu 2005 er 768 krónur á dag.
• Sjómannaafsláttur á tekjuárinu 2004 er 746 krónur á dag.
• Sjómannaafsláttur á tekjuárinu 2003 er 728 krónur á dag.
• Sjómannaafsláttur á tekjuárinu 2002 er 712 krónur á dag.
• Sjómannaafsláttur á tekjuárinu 2001 er 691 krónur á dag.
• Sjómannaafsláttur á tekjuárinu 2000 er 671 krónur á dag.
• Sjómannaafsláttur á tekjuárinu 1999 er 655 krónur á dag.
• Sjómannaafsláttur á tekjuárinu 1998 er 656 krónur á dag.

Dagar til útreiknings sjómannaafsláttar

Dagar sem veita rétt til sjómannaafsláttar eru þeir dagar sem skylt er að lögskrá menn, auk þeirra daga sem maður á rétt á veikindalaunum samkvæmt kjarasamningi. Hver dagur reiknast til sjómannaafsláttar með margfeldinu 1,49. Maður getur þó aldrei fengið sjómannaafslátt fyrir fleiri daga en hann er ráðinn hjá útgerð til sjómannsstarfa.

Hjá mönnum á fiskiskipum sem ekki er skylt að lögskrá á skal miða við almenna vinnudaga á úthaldstímabili í stað lögskráningardaga. Réttur þeirra til sjómannaafsláttar er bundinn því skilyrði að tekjur af sjómannsstörfum nemi a.m.k. 30% af tekjuskattsstofni.

Hjá hlutaráðnum beitningarmönnum skal miða við þá daga sem þeir eru ráðnir við slík störf samkvæmt samningi um hlutaskipti.

Sjómannslaun - hámark afsláttar

Sjómannaafsláttur getur mest orðið jafnhár reiknuðum tekjuskatti af launum fyrir sjómannsstörf. Á tekjuárinu 2011 er hámarkið því 22,9% af sjómannslaunum.

Hjá þeim sem eru með eigin útgerð og stunda sjómennsku á eigin fari teljast sjómannslaun vera reiknað endurgjald og tekjur af atvinnurekstri samanlagt.

Framtalið

Í álagningu er sjómannaafsláttur reiknaður eftir þeim upplýsingum sem færðar eru á framtal. Framteljandi sem gerir kröfu um sjómannaafslátt fyllir út eyðublaðið RSK 3.13; Greinargerð um sjómannaafslátt, og skilar með framtali sínu.

Lög og reglugerð

Um sjómannaafslátt er fjallað í B-lið 67. gr. laga nr. 90/2003, um tekjuskatt. Einnig í II. og III. kafla reglugerðar nr. 10/1992 um persónuafslátt og sjómannaafslátt.