Bifreiðagjald

Bifreiðagjald er skattur sem leggst á öll vélknúin ökutæki sem skráð eru hér á landi að uppfylltum síðar tilgreindum skilyrðum. Ekki skiptir máli hvort um bensín-, dísel- eða rafmagnsknúin ökutæki er að ræða.

Fjárhæð bifreiðagjalds og greiðsluskylda

Bifreiðagjald á hverju gjaldtímabili miðast við skráða losun koltvísýrings (CO2) viðkomandi ökutækis. Skráð losun er mæld í grömmum á hvern ekinn kílómetra. Bifreiðagjald ökutækis á hverju gjaldtímabili, að eigin þyngd 3.500 kg eða minna, skal vera 5.255 kr. fyrir losun allt að 121 gramms af skráðri kolefnislosun ökutækis en 126 kr. fyrir hvert gramm af skráðri losun umfram það. Liggi upplýsingar um skráða losun koltvísýrings viðkomandi ökutækis ekki fyrir skal losun ökutækis ákvörðuð sem 0,12 grömm á hvert kíló skráðrar eigin þyngdar ökutækisins að viðbættum 50 grömmum af koltvísýringi.

Bifreiðagjald ökutækis, að eigin þyngd meira en 3.500 kg, á hverju gjaldtímabili er 49.229 kr. að viðbættum 2,10 kr. fyrir hvert kíló skráðrar eigin þyngdar ökutækis umfram 3.500 kg. Bifreiðagjald ökutækis, að eigin þyngd meira en 3.500 kg, skal þó ekki vera hærra en 77.495 kr. á hverju gjaldtímabili.

Sá sem er skráður eigandi á gjalddaga ber ábyrgð á greiðslu gjaldsins.

Almennt

Af hvaða ökutækjum eru greidd bifreiðagjöld?

1. Ökutækjum sem ætluð eru til fólks- eða vöruflutninga, á fjórum eða þremur hjólum og eru a.m.k. 400 kg eða meira að eigin þyngd og hönnuð til hraðari aksturs en 30 km/klst.
2. Ökutækjum sem draga önnur ökutæki og hönnuð eru til hraðari aksturs en 30 km/klst.
3. Ökutækjum sem ætluð eru til fólks- eða vöruflutninga eða til að draga annað ökutæki og eru búin beltum og/eða stýrimeiðum og a.m.k. 400 kg að eigin þyngd.
4. Fjórhjólum skv. nánari skilgreiningu í tollalögum og eru 400 kg að eigin þyngd eða meira.

Undanþágur

Ökutæki, undanþegin greiðslu bifreiðagjalds eru:

1. Ökutæki í eigu þeirra sem njóta örorkubóta eða umönnunarbóta vegna örorku barna (Þó einungis ein bifreið fyrir hvern rétthafa).
2. Ökutæki í eigu björgunarsveita.
3. Ökutæki sem eru 25 ára og eldri í upphafi gjaldárs.
4. Ökutæki sem eru með skráningarnúmer í innlögn hjá Skráningarstofu og er bifreiðagjald fellt niður í hlutfalli við þann tíma sem númer eru í innlögn svo og ónýt ökutæki, sem sannanlega hafa ekki verið í notkun á gjaldtímabilinu
5. Bifreiðar sem tímabundið hafa verið fluttar úr landi. Framvísa ber útflutnings- og innflutningsskýrslum til sönnunar á tímabundnum útflutningi.
6. Ökutæki sem framleidd eru og skráð með metan sem aðalorkugjafa eða hefur verið breytt þannig að þau geti nýtt metan og breytingin hlotið vottun skoðunarstöðvar skulu greiða lágmark bifreiðagjalds kr. 5.000.-.

Gjaldtímabil, gjalddagar og eindagar

Gjaldtímabil eru tvö, 1. janúar til 30. júní og 1. júlí til 31. desember.

Gjalddagi vegna fyrra tímabils er 1. janúar og eindagi 15. febrúar.

Gjalddagi vegna seinna tímabils er 1. júlí og eindagi er 15. ágúst.

Nýskráðar bifreiðar

Bifreiðagjald er greitt í hlutfalli við skráningartíma.

Gjald nýskráðra bifreiða fellur í eindaga þegar við nýskráningu.

Eigendaskipti

Óheimilt er að skrá eigendaskipti að bifreið nema gjaldfallið bifreiðagjald hafi verið greitt.

Ef tilkynnt er um eigendaskipti án greiðslu bifreiðagjalds fara eigendaskipti í bið.

Seljandi og kaupandi verða að gera upp bifreiðagjaldið sín á milli við eigendaskiptin.

Álagning, innheimta og endurgreiðslur

Álagning er í höndum ríkisskattstjóra og annast hann jafnframt allar beiðnir um endurgreiðslur og leiðréttingar. Þó er þeim sem njóta örorkubóta/umönnunarbóta og telja sig eiga rétt á niðurfellingu bifreiðagjalds bent á að hafa samband við fulltrúa Tryggingastofnunar sem síðar sendir upplýsingar til ríkisskattstjóra um rétt til niðurfellingar.

Innheimtu bifreiðagjalds annast tollstjórar og sjá þeir jafnframt um endurgreiðslu.

Kæruleið

Greiðanda bifreiðagjalds er heimilt að kæra til ríkisskattstjóra álagningu bifreiðagjalds innan 30 daga frá því að gjaldið var ákvarðað. Úrskurðir ríkisskattstjóra eru kæranlegir til yfirskattanefndar.