Ath. Hægt er að sækja um skattkort rafrænt á www.skattur.is

Skattkort veitir rétt til persónuafsláttar á staðgreiðsluári. Á skattkortinu koma fram upplýsingar um nafn, heimilisfang og kennitölu korthafa. Þar kemur jafnframt fram nafn og kennitala maka eða sambúðaraðila ef heimild til samsköttunar er fyrir hendi. Skattkort sýnir hlutfall persónuafsláttar.

Fyrsta skattkort

Þeir sem heimilisfastir eru hér á landi fá sent skattkort í byrjun þess árs sem 16 ára aldri er náð. Skattkortið er hægt að nýta í staðgreiðslu frá ársbyrjun.

Skattkort til þeirra sem flytja til landsins

Menn sem flytja lögheimili sitt til landsins fá sent skattkort eftir að gengið hefur verið frá skráningu hjá Hagstofu Íslands hafi þeir ekki áður fengið útgefið skattkort.

Þeir menn sem koma til landsins með það fyrir augum að dvelja í skemmri tíma en 6 mánuði, þurfa að snúa sér til ríkisskattstjóra til að sækja um skattkort. Við umsókn þurfa þeir sem koma frá löndum utan Norðurlandanna og EES svæðisins að framvísa dvalar- og atvinnuleyfi.

Hvert á að sækja um skattkort

Hafi skattkort glatast eða ef korthafi þarf að fá skattkort sitt endurnýjað af öðrum ástæðum, getur hann fengið útgefið nýtt skattkort.

Hægt er að sækja um almenn skattkort og skiptingu á þeim til ríkisskattstjóra á sérstökum eyðublöðum sem þar fást. Þegar óskað er eftir skiptingu á skattkorti þarf að skila upphaflega skattkortinu og fellur það þar með úr gildi.

Um skattkort með uppsöfnuðum persónuafslætti og önnur sérkort er þó einungis hægt að sækja til ríkisskattstjóra. Sama gildir um skattkort fyrir þá sem koma til landsins til stuttrar dvalar.

Skattkort launþega

Til að menn geti nýtt sér persónuafslátt við ákvörðun á staðgreiðslu á tekjuárinu þurfa þeir að afhenda launagreiðanda skattkort sitt.

Launagreiðandi sem ekki hefur undir höndum skattkort launamanns getur ekki tekið tillit til persónuafsláttar við ákvörðun á staðgreiðslu.

Skattkort manna sem hafa með höndum sjálfstæðan atvinnurekstur

Sá sem hefur með höndum sjálfstæðan atvinnurekstur og reiknar sér endurgjald vegna starfseminnar þarf að hafa skattkortið í sinni vörslu til að geta nýtt persónuafslátt við ákvörðun á staðgreiðslu. Sé reiknað endurgjald það lágt að ríkisskattstjóri geti veitt undanþágu frá staðgreiðslu þarf að leggja skattkortið inn til ríkisskattstjóra. Ef um reiknað endurgjald maka er að ræða gilda sömu reglur um skattkort hans og um skattkort launþega sem starfa við reksturinn.

Skattkort maka

Nýti annað hjóna eða sambúðaraðila ekki að fullu persónuafslátt sinn má fá skattkortinu skipt þannig að maki geti nýtt af ónýtta persónuafslættinum. Um skilyrði fyrir samsköttun er fjallað sérstaklega í kaflanum um persónuafslátt.

Millifærsla persónuafsláttar var:

• 100% vegna tekjuársins 2003 og síðar
• 95% vegna tekjuársins 2002
• 90% vegna tekjuársins 2001
• 85% vegna tekjuársins 2000
• 80% vegna tekjuársins 1999

Sambúðarfólk sem hyggst óska eftir samnýtingu skattkorts þarf að leggja fram skriflega umsókn ásamt skattkortum beggja. Afgreiðsla þessara umsókna er í höndum ríkisskattstjóra.

Par í staðfestri samvist nýtur sömu réttinda og hjón og þarf því ekki að sækja um samsköttun.

Þegar skattkorti hefur verið skipt koma fram upplýsingar á hvoru korti fyrir sig um hlutfall persónuafsláttar.

Afhendi launamaður launagreiðanda sínum skattkort maka, ber launagreiðanda að bæta við persónuafslátt hans af þeirri fjárhæð sem skattkortið veitir rétt til.

Uppsafnaður persónuafsláttur

Launagreiðanda er heimilt að taka tillit til persónuafsláttar, sem samkvæmt áritun síðasta launagreiðanda á bakhlið skattkortsins, hefur ekki verið nýttur það sem af er árinu.
Hafi áritun misfarist er hægt að sækja um skattkort með uppsöfnuðum persónuafslætti til ríkisskattstjóra. Slík skattkort eru gefin út allt árið.

• Þegar skattkorti er skilað til launamanns er mikilvægt að á það séu skráðar upplýsingar um nýttan persónuafslátt, bæði skýrt og rétt.

Önnur skattkort

Auk þeirra skattkorta sem að framan eru nefnd eru til nokkur önnur sérkort. Það eru t.d. skattkort sem gefin eru út til þeirra sem eru búsettir erlendis og eiga ekki rétt á persónuafslætti en fá frá íslenskum aðilum greiðslur. Í þeim tilvikum bera skattkortin ekki með sér fjárhæð persónuafsláttar heldur veita upplýsingar um það skatthlutfall sem launagreiðanda ber að halda eftir sem staðgreiðslu.

Einnig eru gefin út skattkort fyrir þá sem búsettir eru erlendis en fá eftirlaun eða lífeyri á Íslandi og eiga rétt á persónuafslætti á móti þeim greiðslum eingöngu.