Stofnun og skráning hlutafélags (hf)
Sjá nánar í XVII. kafla hlutafélagalaga.
Stofngögn sem leggja þarf inn til skráningar eru auk tilkynningareyðublaðs, stofnsamningur, stofnfundargerð og samþykktir. Æskilegt er að stofngögn séu gerð í þremur eintökum; eitt fer til fyritækjaskrár ríkisskattstjóra, annað til viðkomandi skattstjóra í þeim tilvikum sem skylt er að tilkynna um starfsemi félagsins á virðisaukaskattsskrá og þriðja eintakið fyrir félagið sjálft.
Eftirfarandi er:
- Sýnishorn af stofngögnum í Word, hægt er að breyta og aðlaga að eigin þörfum, síðan prenta út og undirrita.
- Eyðublaðið "Tilkynning um stofnun hlutafélags - RSK 17.20"
- Leiðbeiningar RSK 17.71 með tilkynningareyðublaði. Gott er að prenta leiðbeiningarnar út og hafa til hliðsjónar þegar tilkynningareyðublaðið er fyllt út.
Lágmarkshlutafé skal vera 4.000.000 kr. Skal a.m.k. helmingur vera greiddur við stofnun félagsins þó aldrei lægra en 4.000.000 kr. Ef hlutafé er greitt í öðru en peningum skal koma staðfesting frá lögmanni eða löggiltum endurskoðanda um að viðkomandi eign sé til staðar. Stofnendur hlutafélags skulu vera tveir hið fæsta. Hlutir félags eru í höndum tveggja eða fleiri aðila.
Skila þarf inn útfylltu tilkynningarblaði til fyrirtækjaskrár ríkisskattstjóra ásamt stofngögnum þ.e.:
- Samþykktum - undirrituðum af meirihluta stjórnar.
- Stofnsamningi - undirrituðum af stofnendum.
- Stofnfundargerð - undirritaðri af meirihluta félagsstjórnar eða staðfest af einhverjum sem hefur til þess heimild fyrir hönd félagsstjórnar.
Gæta þarf þess að:
- Tilkynningarblað sé fyllt út í samræmi við stofngögn.
- Rithandarsýnishorn séu rétt.
- Allar undirskriftir séu réttar.
Tilkynningareyðublað skal undirritað af öllum stjórnarmönnum og skulu undirskriftir staðfestar af tveimur vottum, lögmanni, eða löggiltum endurskoðanda.
Kennitala verður til við skráningu félags. ÍSAT-númer (íslensk atvinnugreinaflokkun) er skráð við stofnun samkvæmt upplýsingum stofnenda um aðalstarfsemi félagsins.
